2012 台灣清境之旅 - Day 1

April 5 - April 10, 2012 台灣清境之旅


Day 1 香港 - 高雄 - 自強夜市

今次旅行因為太遲訂機票, 所以夜機去早機返, 不過可以玩足 4日假期都好丫.
我地夜晚 6:50 機, 去到高雄都 8點幾.

小朋友有旅行去, 開心到爆... 坐乜車都鍾意坐車頭... 小妹妹直頭飛身扒晒上去.... HEHE

我地 book 咗車, 14人坐 20人車, 機場接機去 85大樓單程 NT 2500

呢架就係之後都會跟足我地 5日嘅車喇~

好快, 廿分鐘車程就到咗 85大樓

我地分配好房間之後, 放低行李就馬上出動...
本來計劃第一站係去六合夜市, 但去六合夜市要坐 2個站捷運, 經司機介紹, 附近有個自強夜市, 所以我地就改咗去呢度

一去到條街的第一檔, 就已經開始食...食...食...  (有冇咁肚餓呀)

成條街嚟講, 我最鐘意嘅就係生果喇 
佢地蕃茄切盤好出名, 即係蕃茄加薑汁, 我都係第一次食, 都 OK
但我最鐘意都係番石榴同埋蓮霧 (記得要加話梅粉)

講返我地住嘅民宿, 係喺 85大樓入面, 36樓以上都係金典酒店, 35樓以下就有 D係辦公室, 有 D係酒店式公寓/民宿.
聽聞呢 D公寓或者民宿其實係非法, 都係 D人自己買咗幾個單位, 裝修好日租比 D旅客.
我都係喺網上訂房, 呢度有好多好多間唔同公司, 我估都有三十幾間, 每間公司都有十幾到廿幾個單位, 間間裝修風格都唔一樣, 各有特色. 價錢就大家都差不多. 真係睇到眼都花. 最後我地(其實係我 )揀咗 85海角, 住一晚一間海景雙人房 NT 1800, 4人房 NT 2400 都唔算貴丫.
85大樓民宿網85海角

85 海角都真係幾直得推介, 聯絡訂房位小姐好 nice, 佢仲主動出發前一晚 e-mail 話我知佢地當地天氣, 建議我要著咩衫...
仲有, 佢地本來係要收按金, 但知道我地係香港人, 香港匯錢去台灣要收手續費, 所以佢就憑個信字, 就留咗 5間房比我地.
佢地 D房好乾淨整潔, 張床又大又舒服, 仲預備埋 VCD (有西片, 港產片, 卡通片...等等) 莫非驚我地夜晚瞓唔著?

*原來台灣唔興單人床, 整個旅程訂嘅都只得雙人床, 就算有單人床嘅都得好少. 所以如果兩個人一間房, 但又唔想孖舖, 就唯有比錢加床