2011 韓國首爾4天遊 Day 3

2011/5/2 (MON) DAY 3 - 汝矣島 - 鷺梁津水產市場 - 明洞 - N首爾塔 - 惠化韓燒
今日我地去汝矣島, 果度算係一個商業區, 韓國 ge 電視台 KBS 同 SBS 都喺果度, 我地去逛下, 睇下會唔會咁啱見到 d 明星/藝人...

因為我地又唔記得帶地圖, 所以走咗去地鐵站度睇下有冇地圖攞, 但原來係冇 ge, 地鐵職員淨係話可以借我地睇, 咁唯有影底佢啦~

 
呢個有個好大 ge 公園, 櫻花季節呢度開滿櫻花, 最衰我地遲咗啦, 睇唔到... 不過比我地見到幾棵紅葉, 就咁喺度影咗半粒鐘都有...

我地入去 KBS 度行咗個圈, 冇嘢睇, 又唔見明星, 我地就去食海鮮喇

呢個咖啡包好香好好味

1號線鷺粱津地鐵站得一個出口 (如果係 9號線個出口會喺下面路邊), 出嚟直行再直接上天橋, 沿天橋一路行, 會見到一幢金色的大廈, 再沿路行, 見有樓梯落去就係喇.

呢幢金色的大廈就係 63大樓 

未落到去, 已經聞到好大陣魚醒味, 一落到去... 嘩~ 乜真係大得咁緊要...

其實間間賣 ge 都差唔多, 我地一路向前行, 就見到之前網上 blog 友介紹果間, 就算比人呃都覺得好似抵d...

本來我地想食皇帝蟹, 但佢全部都好大隻, 我地驚食唔晒又貴, 就好似呢隻咁, 要成 85770 won 即差不多 HK$650 (雖然已經叫做比喺日本平好多), 所以最後揀咗長腳蟹, 平成三分二呀!

當我地揀緊海鮮, 心大心細 ge 時候, 有另一班香港人又係嚟呢個舖買海鮮, 原來大家都係睇到同一個 blog 介紹.

 ok, 揀好晒就計價錢

殺價 ge 時候, 我呢個識好少好少韓文嘅團友, 真係識講咩就講咩, 最後平咗幾千won, 以為好多, 計返先知原來先得果幾十蚊... 不過都好丫 haha

同埋, 當我地喺街市度揀緊海鮮ge時候, 有D餐廳ge人會嚟搵生意, 佢會企喺你隔離幫你翻譯(佢識講普通話), 有時仲會幫你講下價(其實唔知係咪預先夾好咗啦), 之後, 就會帶你去佢果間餐廳度叫你幫襯佢. 咁啱呢間就係我地果 blog 友去果間. 我地都冇所謂, 反正都係要搵一間, 而且佢地唔係剌身就係蒸, 都唔駛講煮得好唔好食嘅...

唔食菜ge怪人喺度扮食菜...

我地最後揀咗一條比目魚做刺身 12,000won

2隻八爪魚仔, 隻八爪魚真係慘, 死之前都要比我地玩完一輪先...

食嗰時佢都仲郁緊, 仲會吸住條脷...

3隻鮑魚

6隻大蝦

一隻响螺

一隻長腳蟹

比目魚條骨去煲湯

食完海鮮，坐返1號線去首爾站轉4號線去明洞行一陣幫朋友買嘢, 記得買完嘢要去填張form先, 唔係去到機場冇得退稅.


攪掂晒之後, 我地就坐的士上去纜車站, 唔駛跳標, 2400won. 其實由明洞可以行上去, 不過我幾年前行過一次, 條路超斜, 所以唔想再行, 揀搭車, 不過後來知道原來新起咗條電梯, 依家上去唔駛行斜路...

新起的電梯位置就係纜車站左邊玻璃屋仔果度喇

纜車來回每位 7500won

如果唔搭電梯, 想行上去的話, 就係行下面呢條斜路

一上到首爾塔, 就會見到呢部咖啡機, 就會諗起具俊表喺度飲咗杯咖啡, 團友花樣男子中毒, 話要學具俊表喺度飲返杯喎~ hehe

為求影到一張完美的首爾塔相, 兩位團友不惜瞓身... 我就坐埋一邊睇佢地表演啦 haha

呢度我地影咗好多相, 玩咗好耐... haha... 又諗起其中一位團友條頸...

又嚟具俊表上身...

臨走時我地叫咗個拎住部單反相機的哥哥仔幫我地影張合照, 心諗佢拎得部咁ge機, 應該影相都ok得...點知, 下面左邊果張就係佢幫我地影ge, 地下仲多過個塔... 後尾我地自己 set 自拍, 影得仲好(係黑咗少少).

玩(影相)到太陽落山我地都落山喇...

之前有 blog 友介紹呢間喺惠化嘅韓燒, 好味又抵食, 所以我地呢晚都特登去試下...
惠化站 4號出口, 一出左手邊會見到呢條大街, 沿大街一直行, 行到差不多盡會見到呢間店

 然後轉左行入小街, 小街再行前幾個鋪位就會見到呢個門口

果然真係唔錯, 價錢唔貴, 味道OK, 炭爐燒烤, 我鐘意...

碟生菜蘑菇係送嘅, 佢地見你差不多食完又會再比一碟你

食飽可以行下, 呢條街都有好多舖

因為已經係最後一晚, 聽日就要返香港, 所以我地雖然好飽, 但都去咗試想食好耐ge雪糕, 呢間雪糕店超多分店, 可以話去到邊都見到佢.

D雪糕蛋糕好靚, 其實邊捨得食呀!

呢個係炒雪糕

YUMMY YUMMY ~