MarcoTiffany'Blog: 6月 2011

2011年6月6日星期一

端午節睇龍船 20110606

今朝一早, 兩個小朋友嘈住要去睇龍船, 同佢地講好, 睇完要返嚟溫書, 因為聽日要考試
小朋友早餐食咗糭, 我兩公婆就乜都冇食就出發...

佢兩個踩住滑板車, 我地就行路

好在今日陰陰天, 唔算太晒, 又有一陣陣涼風, 都幾舒服

城門河旁凡有樹蔭底都企/坐滿人

雖然唔係太晒, 但都好鬼熱, 呢個賣雪糕雪條小販發達啦~

沙燕橋封咗唔比車行, 所以橋上面都企咗好多人
另外, 其實坐喺帳蓬裡面係咪會更熱更焗呢

呢隊人唔知係咪冇練習, d人落槳都唔齊, 中間幾個人仲超 hea... 求鬼其...人地衝埋線喇, 佢地都未爬到一半... haha

2011年6月5日星期日

今日係最後一日喇, 時間真係過得快... 我地晏晝 3點幾機, 所以都唔敢去太遠, 既然對面就係 LOTTE Mark, 當然就喺呢度行下, 睇下仲有D咩嘢買啦!

執好行李, check-out 之後就去咗 Dunkin' Donuts 度食早餐, 呢度有好多唔同味道嘅 donut, 我地一人叫一個餐, 一杯咖啡+兩個包/donut...好似好大食咁 haha... 不過呢度都唔平, 一個早餐的價錢仲貴過尋晚喺惠化食韓燒...攪錯...

秘密花園入戲太深...

嘆完個早餐之後, 今日主要行程就係 LOTTE Mart, 非常近我地住的地方, 就喺對面馬路, 好方便~

手推車要先比100won按金, 還車時插返條鎖匙入去, 佢就會退返比你.
前一日嚟, 差D唔記得還車, 但後來還車後又唔知點解唔見咗個100won....蝕咗...

呢度好大, 有兩層

嘩~ 有好多士多啤梨呀~ 好香呀~ 買買買~
仲有溫室蔬菜, 真係好新鮮咁呀~

最後又買咗兩大袋...
朝早出嚟時寄存咗行李喺office, 攪到要喺走廊好努力咁將頭先買的嘢pack返入喼

本來回程都想約S.A個司機, 不過時間就唔到...
搭機場巴士都好方便, 就喺對面馬路, S.A有派職員同我地一齊行過去.架巴士好少人坐, 全車計埋我地得5個人...

每人一喼+幾袋

去到發現都唔係淨好多時間, 要即刻搵返個 counter 攪埋D退稅先可以去寄行李, 咦~ 易小姐...妳好多單喎...唔好比喜哥哥見到....hahaha

攪掂退稅之後, 我地就去寄行李...點知...超重 ...唉...頭先咁努力pack喼, 依家又要拎返d嘢出嚟 hand carry上機...

攪到冇晒時間... 不過我地都唔理咁多... 食埋個麵先, 嚟咗韓國4日都冇食過麵 (杯麵唔計)

HAHA... 食埋去到閘口已經 FINAL CALL 好趕呀...

再見lu...唔知幾時可以再嚟呢

喜哥哥嚟接阿茵機, 真係好喇~ 我同潔儀梗係癡車坐啦~

4日行程, 最大功臣就係呢張車站圖喇~
希望可以好快再有機會去多次韓國啦!!!

2011年6月4日星期六

2011 韓國首爾4天遊 Day 3

2011/5/2 (MON) DAY 3 - 汝矣島 - 鷺梁津水產市場 - 明洞 - N首爾塔 - 惠化韓燒
今日我地去汝矣島, 果度算係一個商業區, 韓國 ge 電視台 KBS 同 SBS 都喺果度, 我地去逛下, 睇下會唔會咁啱見到 d 明星/藝人...

因為我地又唔記得帶地圖, 所以走咗去地鐵站度睇下有冇地圖攞, 但原來係冇 ge, 地鐵職員淨係話可以借我地睇, 咁唯有影底佢啦~

呢個有個好大 ge 公園, 櫻花季節呢度開滿櫻花, 最衰我地遲咗啦, 睇唔到... 不過比我地見到幾棵紅葉, 就咁喺度影咗半粒鐘都有...

我地入去 KBS 度行咗個圈, 冇嘢睇, 又唔見明星, 我地就去食海鮮喇

呢個咖啡包好香好好味

1號線鷺粱津地鐵站得一個出口 (如果係 9號線個出口會喺下面路邊), 出嚟直行再直接上天橋, 沿天橋一路行, 會見到一幢金色的大廈, 再沿路行, 見有樓梯落去就係喇.

呢幢金色的大廈就係 63大樓

未落到去, 已經聞到好大陣魚醒味, 一落到去... 嘩~ 乜真係大得咁緊要...

其實間間賣 ge 都差唔多, 我地一路向前行, 就見到之前網上 blog 友介紹果間, 就算比人呃都覺得好似抵d...

本來我地想食皇帝蟹, 但佢全部都好大隻, 我地驚食唔晒又貴, 就好似呢隻咁, 要成 85770 won 即差不多 HK$650 (雖然已經叫做比喺日本平好多), 所以最後揀咗長腳蟹, 平成三分二呀!

當我地揀緊海鮮, 心大心細 ge 時候, 有另一班香港人又係嚟呢個舖買海鮮, 原來大家都係睇到同一個 blog 介紹.

ok, 揀好晒就計價錢

殺價 ge 時候, 我呢個識好少好少韓文嘅團友, 真係識講咩就講咩, 最後平咗幾千won, 以為好多, 計返先知原來先得果幾十蚊... 不過都好丫 haha

同埋, 當我地喺街市度揀緊海鮮ge時候, 有D餐廳ge人會嚟搵生意, 佢會企喺你隔離幫你翻譯(佢識講普通話), 有時仲會幫你講下價(其實唔知係咪預先夾好咗啦), 之後, 就會帶你去佢果間餐廳度叫你幫襯佢. 咁啱呢間就係我地果 blog 友去果間. 我地都冇所謂, 反正都係要搵一間, 而且佢地唔係剌身就係蒸, 都唔駛講煮得好唔好食嘅...