我的第二個翻糖蛋糕

我的第二個翻糖蛋糕

朋友見到我個翻糖蛋糕之後, 問咗我點整, 跟住就要我教佢整咗呢個蛋糕嚟送比佢姨甥女, 基本上同我上一個做法完全一樣.

我的第一個翻糖蛋糕

我的第一個翻糖蛋糕

前幾星期, 收到朋友邀請參加佢 Wedding party, 但朋友順帶想我幫佢整個蛋糕, 雖然朋友話簡簡單單便可, 但我絕對唔會就咁整個 cheesecake 去啦...  於是, 不停上網搵整結婚蛋糕的食譜, 睇 youtube 片... 真係好多謝 ~Hongling CakeWorld~ 佢的網頁, 佢的片段都非常詳細, 我有問題都會經 facebook 問佢... 正當我要準備試做一個蛋糕來做實習時, 我另一個朋友就叫我不如幫佢個女做一個生日蛋糕當做實習... 所以, 呢個蛋糕就變成我第一個作品...

糖皮材料:

500g 棉花糖（白色）

2 大湯匙清水（30ml)

1 kg 糖霜（icing sugar )

(作參考: 6吋大概要 400-500g, 10吋大概要 700-800g)
 

我呢個蛋糕一共做咗 600g 棉花糖, 加埋 1200g 糖霜, 即一共有 1800g 左右糖皮,
當然最後有剩用唔晒.

做法:

1) 將棉花糖加入水，置微波爐加熱1至2分鐘

(因為我無微波爐, 所以我隔水蒸, 由於蒸會有蒸氣比較濕, 所以我冇落水,
但最後發覺唔落水會好硬好難搓, 所以係要落嘅)

2) 我每次蒸1分鐘, 未溶就再蒸1分鐘, 直至棉花糖漲大及溶化，
就取出用預先搽上菜油的匙拌勻。

3) 慢慢分多次加入已篩過的糖霜（預留一杯糖霜備用）

4) 拌勻直至粉團軟滑。將粉團放工作枱上，

5) 續少加入預留的糖霜搓至幼滑及不沾手，可加入食用色素染色

6) 用保鮮紙包好，放入雪櫃雪一夜

7) 隔天拿出來置枱上，待它回至室温便可使用。

[剛做好放雪櫃一晚，回軟可以用。但之後唔可以再入雪櫃，否則糖皮會受潮而變得痴笠笠。用完後入密實袋，再入密封盒就可以]
 

Buttercream 奶油：

無鹽牛油 250g

糖霜 180g (原本係糖粉, 但我試過用糖粉好似唔係好溶, 食到一粒粒糖, 所以我改用糖霜)

糖漿 80ml (原本係 1份水+ 2份糖, 但我覺得太甜了, 改為 1份水 + 1份糖, 用煲煮, 直到所有的糖融化於水中)

雲呢拿油幾滴

做法:

無鹽牛油及糖霜用攪拌器高速打 5分鐘，

再加入糖漿及雲呢拿, 用攪拌器高速打 7-10分鐘便完成

當混入糖漿時，應該少量分次落糖漿，在攪拌器低速下混入，不要一次過倒曬糖漿。

當看到糖漿巳與奶油混合均勻後，可將攪拌器調回至高速打 7-10分鐘。

我這個蛋糕低層要8吋, 加上層6吋

8吋蛋糕我做6個顏色, 一個顏色的份量：

蛋 70 g、自發粉 70 g、糖 50 g、無鹽牛油 70 g  x  6 次做 6 個顏色

 
(原來紅色唔記得影相添)

6吋蛋糕本來都想整6個顏色, 但係太赲喇, 最後就咁焗, 份量:

蛋 150 g、自發粉 150 g、糖 120 g、無鹽牛油 150 g  x  2 個

做法：

先將牛油同糖用中速打 3分鐘，刮一刮盤底，再中速打3分鐘。

之後用中慢速加蛋，要慢慢加，見打勻唔見咗，至可以再加落去打。
千祈唔可以心急，這步驟相當重要。

最後加自發粉，用中速打，又係打3分鐘。
加入粉的時候，加大約 1湯匙(15ml)水入去一齊打，蛋糕出黎會 moist D

焗爐用170度，放中層焗。

焗時一定要目測，見個面開始燶, 就要放張鍚紙蓋面焗。

圓形蛋糕盤至少要焗一個鐘。自己要用牙簽插入 check 熟未。

 焗好放涼之後, 就可以搽 cream, 不過我搽得好肉酸, 還要多練習

 

另外, 準備好之前預先整好嘅糖皮及工具

將糖皮碌薄, 大約 2mm 厚, 然後覆蓋在蛋糕上, 用手及工具慢慢掃平.

 

我另外搓咗D小圓粒用來作圍邊裝飾 (其實係遮醜)

淘寶買嘅工具, 比香港買平好多.

我還用了雪花模吸了大大細細不同顏色的雪花做裝飾.

加埋預先買定人物公仔就完成.

入埋紙盒綁上絲帶就可以送比人喇

入面切開都好靚丫

Rainbow Cheese Cake 彩虹芝士凍餅

Rainbow Cheese Cake 彩虹芝士凍餅

 

一個望見就覺得開心的蛋糕, 原來並不難整...

當日是給我其中一位好朋友做的生日蛋糕, 她看到後很高興, 還拿著蛋糕不停地跟其它朋友一一合照, 我看到她很喜歡, 我都好開心. 最後還要拿一件回家給媽媽吃呢...

 

 

材料:

消化餅 (我比較鐘意用 OREO) 100g

無鹽牛油 35g

忌廉芝士 250g

砂糖 75g

牛奶 100g

淡忌廉 135g

魚膠粉 15g

水 45g

檸檬汁 35g

彩虹色素

 

 

做法:

1. 先做餅底, 消化餅壓碎, 加入已座溶牛油攪拌, 放 6" 餅模壓平, 放入雪櫃待用.

2. 忌廉芝士加糖用機打至滑身, 再加牛奶慢速攪拌.

3. 淡忌廉打到 6 成左右企身待用.

4. 魚膠粉加水攪勻, 用熱水座溶後, 加入檸檬汁攪拌待用.

5. 將打起淡忌廉(3)加入忌廉芝士(2)攪拌, 再加入檸檬魚膠水(4)攪成糊.

 

 

將糊分成 6 碗 (視乎你要做多少個顏色)

 

 

加入色素 (深淺按個人喜好, 我這裡每個色一滴)

 

 

先倒第一個色入餅底, 倒第二個色時盡量慢慢對正中心位置倒, 不要心急, 之後一樣, 全部對正中心慢慢倒, 出來效果會比較好. 還有, 分糊時, 最底層顏色糊要比其他層為多, 最面層顏色糊最少, 這樣會更靚. 我這個就是紅色的少了, 全部沈底被橙色的蓋過晒... 下次要做一個更完美的.

 

 

可以留起一點色糊用來拉花或寫字

 

 

最後我再加了些彩色糖在上面, 不過有點溶化了...