2008 冬至

今年冬至, 我們到老爺家食飯. 有老爺係度, 梗係有好嘢食啦... (最右手邊黃色衫嘅就係大廚喇)


羊腩煲

盤菜 (你睇D元貝幾大粒...)

最後嚟個糯米飯

大家睇到係咪都流晒口水呢....嘻嘻!!!

粉嶺宣道園

星期日，教會戶外週，去粉嶺宣道園，當日 9:00我們在學校集合後便坐校車出發。


到達後, 各班有不同活動...小一至小二(火花II & 火花III)做手工, 小三至小四(T&T I & T&T II)射箭, 小五至小六(T&T III)攀石...
我是負責 T&T III 的, 所以就帶著他們往攀石, 先看看他們, 很留心地聽指導員講解穿上安全帶...

第一組試攀的是 Queenie (左) 和 善婷 (右)....

第二組試攀的是 Sheron (左) & Monica (右)....

第三組係子獻 (左) & Justin (右).....哈! 子獻喺攀石期間叫咗個指導員做 Auntie, 搞到被吊喺半空唔上唔落...子獻惟有大叫 "阿媽~ 救命~"

最後係思銘...

佢地個個之前都未玩過架, 但個個都好勇敢. 樂於嘗試, 勇於挑戰...最後, 個個都能夠順利完成.
左邊呢幅牆中間其實係斜斜地向上, 而右邊呢幅則有一級凸出嚟...小D氣力都上唔到去...真係唔好以為好容易...
玩完攀石之後, 佢地就走晒去玩繩網...呢個比較細...好小兒科, 我個仔都玩到. 個大嘅繩網就冇開, 因為唔夠人手看管喎...

有些小朋友打高爾夫球...

打羽毛球...

踢足球...還有藍球...排球...等等

到接近中午的時候, 一班較細的小朋友圍在一起, 各自拿出 Daddy Mammy 為他們準備的小食, 跟大家一同分享...

原來 Marco 同思穎喺度打緊康樂棋....玩得好似好開心咁喎...

最後要走嘅時候, 個個小朋友都好似未玩夠咁...重話要再嚟多次 tim...

MARCO 英文朗誦

前幾天，Marco 參加了英文朗誦比賽，這次給他參加比賽，純粹想讓他每樣事情都能去嘗試參與，從中累積多一些經驗。

雖然他得不到冠亞季軍，但他也拿了 84 分的好成績。
今次真的要多謝姨姨，能在百忙之中抽時間來替他練習。

以下便是他今次朗誦的文章:
Ocean Travel        By Jennifer Tweedie
If I could travel the oceans blue, these are the things that I would do:
Fly with puffins under the sea.
Dive with seagulls. Fish for my tea.
Cling to the tail of a rolling whale.
Leap with dolphins in a buffeting gale.
Soar with an eagle. Hunt with a shark.
Frolic with seals. Fly home before dark.

評判給他的評語是:
Spoken confidently.
Don't stress the beat too much.
Pause between verses.
Most pronounciation was clear.

Marco, 媽咪非常滿意你今次的表現，希望你下次繼續努力呀!!!

話咁快就十年...

時光飛逝, 轉眼即過...

前幾天 11/11 係我和張生註冊結婚的十週年紀念日...
還記得當時決定得非常倉促, 啱啱只有兩星期左右, 也沒有先徵求父母是否同意, 只是 "通知" 一聲, 便去登記了... 但不要誤會, 並非因為有餡... 只是為了要揀 1111 這日子... (我地都唔明點解) 
其實係我地兩個一早已經有共識, 想借政府嘅首次置業貸款, 因為知道單靠我們兩人, 再怎樣努力, 也不能於短時間內儲到首期買樓....所以一聽到可以申請, 便拿拿淋去註冊.
結婚後無耐, 張生曾有跟我說過, 覺得他自己好像行得比佢其它大學同學快, 因為畢業只有短短兩年便結婚, 其它同學還在讀 Master, 出國深造或做研究生.....當時我覺得他好像有點後悔....
但十年後的今天, 他看著自己昔日的舊同學, 結婚的結婚, 生BB的生BB...覺得比別人早也不是甚麼大問題, 反而有點慶幸自己比人走得快...

兩表兄妹

在這一段影片中，看見 Marco 和 Natalie 兩表兄妹在小息時相約一起玩耍的情況....好像很愉快啊!　哈哈....只可惜沒有聲音......大家不妨猜猜他們在說些甚麼!

生日正日

老公生日正日那天(10/21), 一早返到公司, 已經收到老死 Cherie 之祝賀, 我呢個 friend 記記埋埋好多嘢, 電話號碼; 生日日期; 結婚記念日; 乜鬼都記得...仲係連人地嘅都記埋喎....簡直係勁! 我唔得喇....開始老....唔想記咁多嘢!!!

今年張生D同事預早一日打電話比我, 問我有乜節目, 話想大家一齊食飯同佢慶祝. 我梗係冇所謂啦, 因為我同張生都鍾意一大班人一齊玩, 開心D嘛.....最後, 我地 book 咗喺佢地公司附近嘅一間火鍋店度打邊爐.
當日, 佢D同事全部扮唔記得, 諗住夜晚比個驚喜佢, 除咗佢上司TT有同佢講生日快樂之外, 其它人都扮冇事發生, 唔知嗰日張生估唔估到呢?....會唔會有D唔開心呢?....有冇係度諗緊點解班兄弟一個二個都唔記得自己生日呢?.....(係唔係你平時對人唔好呢?要唔要檢討吓!!!)
到了放工時候, Pat 姐打比我, 話比我知張生撘正 5:30黑晒面走咗喎.....(攪笑!...張生你唔係真係嬲呀?) 後尾你話我知你要去灣仔....哎呀! 無啦啦你去乜鬼灣仔呀......我地約咗係北角食飯架嘛.......等我又要諗計叫你返北角.....好易穿煲架.....
最後唯有話係朋友介紹.....一定要試囉(自己都唔信嘅大話)!!!.....其實, 我諗你一定估到....平時我地兩個人, 去邊度食都一樣, 點會係都要返北角丫.....
到咗之後, 我特登行後D, 等你開門, 一開門就見到成班同事(兄弟)喺度等緊你...係咪覺得好感動呢....話時話....有冇一DD驚喜?? (睇怕都冇)

原來, 當日唔係淨係同張生慶祝...佢同事 Terry 喺 10/18 生日, 所以佢地一次過慶祝埋....睇吓個蛋糕...有兩支蠟燭架...一人一支....(唔好吹熄埋人地嗰支蠟燭呀)

Pat 姐......張生話其實佢都估到一二架喇.....因為一來, 佢話妳地唔會唔記得佢生日(咁有信心??), 2來, 原來 Penny 一早話咗比佢知妳會同佢攪生日會呀....!!! 冇晒驚喜!!! 唔怪得知....原來佢放工特登走咗去灣仔飛番個靚髮啦!!!

蝦子餅牛一

前幾天 (10/21) 係我蝦子餅嘅牛一, 一班 friend 預早嚟我地屋企食飯慶祝...(當然又係玩煮飯仔啦)

今次 D 餸同上次中秋有D唔同...
張生亦都冇再將條班掉咗落垃圾桶喇.....
今次煲咗個番茄薯仔豬骨湯

同樣都係有條班

蒜蓉蒸蝦 (唔知點解會有咁多水)

腐乳生菜

辣清酒煮螺

豉椒炒蜆

什錦粉絲煲

芥蘭炒牛肉

咖哩炒蟹

睇吓隻蟹幾大隻....

有冇見到呢度一共有幾多隻手一齊嚟對付隻蟹?
佢D腳好有力, 差D比佢插死...所以, 我地都要用毛巾先將佢D腳包起, 才可以落刀....

最後, 梗係有唱生日歌同食蛋糕啦...

Hong Kong Disneyland

因為今年最後決定唔帶 D 細路去旅行, 所以喺暑假期間搵咗一日, 帶佢地去 Disneyland 玩吓, 當係補番數....而且表姐夫識人, 買飛有得平....
嗰日陽光普照, 非常炎熱..... 我地兵分兩路, 一D人搭 R42 去, 一D人就搭港鐵去......原來 R42 平日只得一班車咋...好在一早睇咗時間表.  巴士車程好快, 半個鍾左右就已經到咗, 快過 "港鐵隊" 好多.
我地到咗之後, 先去排隊幫 German 兩個表弟買飛 (後來加入, 買唔切平飛), 之後四圍影吓相, 等咗一陣, 終於齊人, 可以入去玩喇....
其實 Marco 同 Tiffany 細個時已經去過, 不過可能始終係細, 冇乜記憶咁, 所以今次去到, 佢兩個都勁興奮, 四圍跑跑跳跳......佢兩個 D 汗簡直未停過......
一入到去, 筱蔓就帶住班靚一支箭咁走咗去巴司光年度, 我梗係唔跑, 慢慢行過去....點知去到嘅時候, 佢地已經排到去就嚟轉入室內, 我又唔可以由尾行返去佢地嗰度, 因為後面已經有好多人, 咁我企喺佢地嘅隔離一行, 諗緊點算嘅時候, 筱蔓已經叫我快 D 跨過去, 緊住 Marco 同 Tiffany 唔知係咪嗰排睇得奧運多....係咁拍晒手, 叫 "媽咪加油" "媽咪加油".....攪到後面 D人都望住晒我......好在我冇 PK....好順利咁跨咗入去.....但係.....就有個工作人員行埋嚟向我訓示了一番.......我一於好少理, 淨係答佢一句, 我要搵番 D 細路嘛!!!
之後, 可能我地太多人, 步伐有點慢, 結果唔係玩咗好多嘢, 馳車天地都係玩咗一次咋....
玩到差不多7點時, 我地冇睇煙花就走. 之後去咗東涌食埋飯先返屋企.
走嘅時候, Marco 已經係咁問: "我地幾時再去過.....?" "我好想再玩多一次馳車天地...."

Marco! Tiffany! 出力呀!!!........你地頂唔頂得住呀?
Marco: 呀~~ 好重呀......我.....我....就嚟冇力啦.....!!!
Tiffany: 嘻! 好輕之嘛....我都唔洗出力嘅!


海澄...妳負責揸車呀?...好似信心十足咁款喎.....
結果係.........
架車勁擺.........
一時"西"去左.......一時"西"去右.......
好似玩緊碰碰車咁.....
阿女....咁攪法.....媽咪條頸點醫都醫唔好架喇.......


唉.....Daddy....乜解究你成日都咁多電話架........傾極都傾唔完.....


張相係咪影得好靚呢?